បក្សនយោបាយចាប់ផ្ដើមឃោសនាបោះឆ្នោតថ្ងៃដំបូង
យុទ្ធនាការឃោសនាថ្ងៃដំបូងនៃការបោះឆ្នោតជ្រើសតាំងតំណាងរាស្ត្រ នីតិកាលទី៥ ត្រូវចាប់ផ្ដើមនៅព្រឹកថ្ងៃទី២៧ មិថុនា នេះ។ ក្នុងចំណោមគណបក្សនយោបាយទាំង ៨ គេឃើញមានគណបក្សនយោបាយធំៗពីរ មានកម្មភាពលេចធ្លោជាងគេ គឺគណបក្សប្រជាជនកម្ពុជា និងគណបក្សសង្គ្រោះជាតិ។ គណបក្សប្រជាជនកម្ពុជា ដែលជាគណបក្សកាន់អំណាចអស់រយៈពេលជាង ២០ឆ្នាំមកហើយនោះ បានជ្រើសរើសធ្វើពិធីរំលឹកខួបលើកទី៦២ នៃថ្ងៃបង្កើតគណបក្សនេះជាមួយថ្ងៃចាប់ផ្ដើមឃោសនាបោះឆ្នោតតែម្ដង នៅកោះពេជ្រ។ ក្បួនរថយន្តនិងម៉ូតូដង្ហែចេញពីមជ្ឈមណ្ឌលកម្សាន្តកោះពេជ្រ ដែលជាទីកន្លែងជួបជុំគ្នានៅក្នុងវេទិការជួបជុំគ្នារបស់ថ្នាក់ ដឹកនាំកំពូលនៃគណបក្សប្រជាជនកម្ពុជា និងប្រជាពលរដ្ឋគាំទ្រប្រមាណ ១ម៉ឺននាក់ នៅព្រឹកថ្ងៃទី២៧ មិថុនា ដែលជាថ្ងៃបើកយុទ្ធនាការឃោសនាដំបូង។ ក្បួនដង្ហែនោះមានតុបតែងលំអទង់ជាតិ ទង់គណបក្ស ស្លាកសញ្ញារបស់គណបក្ស និងមានរូបផ្ទាំងស្លាកសញ្ញា ឬនិម្មិតសញ្ញាគណបក្ស រូបទេវតាបាចផ្កា និងលេខរៀងទី៤ របស់គណបក្សប្រជាជនជាដើម។… គណបក្សសង្គ្រោះជាតិចាប់ផ្ដើមយុទ្ធនាការឃោសនាថ្ងៃដំបូងរបស់ ខ្លួន ដោយមានសមាជិកគាំទ្រចូលរួមហែក្បួនច្រើនជាង ១ម៉ឺននាក់។ នេះជាកាឃោសនាជាផ្លូវការរបស់គណបក្សនយោបាយ ដើម្បីបញ្ជូនសារនយោបាយរបស់ខ្លួនទៅដល់ប្រជាពលរដ្ឋឲ្យបានយល់អំពី ភាពខ្លាំងរបស់គណបក្ស និងអំពាវនាវឲ្យប្រជាពលរដ្ឋបោះឆ្នោតគាំទ្រឲ្យបានច្រើន។ ក្នុងថ្ងៃឃោសនាជាផ្លូវការដំបូង គឺថ្ងៃទី២៧ មិថុនា គណបក្សសង្គ្រោះជាតិ ដែលជាបក្សរួមបញ្ចូលគ្នារវាងគណបក្ស សម រង្ស៊ី និងបក្សសិទ្ធិមនុស្ស បានយកទីតាំងចំនួនពីរកន្លែង ដើម្បីហែក្បួនឃោសនាទ្រង់ទ្រាយធំរបស់ខ្លួន គឺនៅក្រុងតាខ្មៅ ខេត្តកណ្តាល និងនៅទីលានប្រជាធិបតេយ្យ រាជធានីភ្នំពេញ។ ពិធីនេះមានមនុស្សចូលរួមរាប់ម៉ឺននាក់ និងមានដង្ហែក្បួនតាមរថយន្ត ឬម៉ូតូកាត់តាមផ្លូវសាធារណៈមួយចំនួនផង។…
វិទ្យុអាស៊ីសេរី
http://www.rfa.org/khmer/news/politics/first-day-of-campaigning-06272013000500.html
